Sagan

Vélar og verkfæri ehf. er heildverslun sem stofnuð var árið 1942 og hefur verið rekin af sömu fjölskyldunni allar götur síðan.

Verslunarrekstur, umboðs- og heildverslun var ekki sá starfsvettfangur sem stofnandinn, Guðmundur Jónsson, valdi sér sem ungur maður. Hann nam trésmíði og starfaði sem smiður í nokkur ár, meðal annars í Noregi. Í kjölfar vinnuslyss ákvað Guðmundur að reyna fyrir sér á nýjum vettfangi. Hann nýtti sér þau sambönd sem hann hafði komið sér upp í Noregi, auk þess sem hann ferðaðist töluvert um Norðurlöndin, Þýskaland og Bretland til að afla sér umboða og viðskiptasambanda.

Árið 1919 markaði tímamót hjá Guðmundi en þá hóf hann rekstur umboðs- og heildverslunar og stofnsetti Verslunina Brynju við Laugaveg, sem löngu er orðin þjóðþekkt.

Guðmundur seldi Brynju árið 1937 og beindi kröftum sínum að umboðs- og heildsölu. Það var svo 1942 sem Guðmundur stofnaði hlutafélagið Vélar og verkfæri í félagi við son sinn og tengdasyni. Upphaflegt markmið fyrirtækisins var verksmiðjurekstur af einhverju tagi. Starfsemin var lítil sem engin fyrstu árin, einkanlega vegna ófriðar í heiminum. Ekkert varð úr verksmiðjurekstri en aftur á móti óx starfsemin á sviði umboðs- og heildverslunar jafnt og þétt.

Guðmundur Jónsson rak fyrirtækið allt til dauðadags, en þá tók Guðmundur S. Guðmundsson, sonur hans við því. Árið 1963 tók síðan Sveinn H. Björnsson, dóttursonur Guðmundar, við stöðu framkvæmdastjóra og stýrði fyrirtækinu næstu 50 árin, eða til ársins 2013.

Núverandi framkvæmdastjóri Véla og verkfæra er Björn V. Sveinsson, barnabarnabarn Guðmundar Jónssonar.

 
Saga GUÐMUNDUR JÓNSSON Á YNGRI ÁRUM
Guðmundur Jónsson á yngri árum.

Saga Brynja 1930
Verslunin Brynja, mynd úr tímaritinu Fálkanum 1930.

Saga auglysing Brynja
Auglýsing úr tímaritinu Unga Ísland.

Saga stjorn
Úr Dagblaðinu Vísi 1983.